拍子繩如何調較合適長度?

平日買拍子繩時好多人會問「有冇大人用嘅繩?」、「有冇小朋友用嘅繩?」、「喺咪長啲會好啲?」其實拍子繩嘅長度對花式跳繩動作嘅表現有好直接嘅影響,調較適合嘅長度對做動作就更得心應手!想知點樣先為之適合嘅長度?過長嘅話應該要點處理?

何為合適長度?

繩過長或過短都會影響花式動作表現,太長除咗需要用更多力去擺繩外,仲會令繩落地嘅時候更易出現「彈地」情況,即過多繩接觸地下而導致繩落地時反彈,令到跳繩者要跳得更高去避免失誤,總括而言過長嘅繩會令跳繩者手同腳都需要用嘅多嘅力去完成動作。相反,過短嘅繩非常容易理解,繩嘅空間不足令到跳繩者唔可以用正常狀態完成動作,可能需要屈曲身體去配合細小嘅空間,或者放大手嘅擺繩動作,令到繩嘅空間增大以完成動作,無論前者定後者都會令動作更難完成及不美觀。了解長度嘅重要後,就可以發現每個人適合嘅長度都唔同,要取決於個人嘅高度及用途。

跳繩新手/初學者 - 量度長度

由於新手/初學者對花式動作仲處於學習階段,動作擺位及發力方式未純熟,會用較大嘅肢體動作去完成花式,所以可以用靜止站立方式去調節長度。

  1. 雙腳踏喺繩正中間
  2. 將繩兩邊拉直
  3. 繩長大約位於「胸口至肚臍」之間就為之合適

跳繩進階者 - 量度長度

由於進階者對跳繩動作比較純熟,可以用較細嘅活動幅度去完成擺繩及跳躍,所以可以跳住咁去調較長度。

  1. 以最放鬆舒適嘅姿勢跳連續前跳
  2. 繩子劃過頭頂時預留「不多於半個頭」嘅空間

拍子繩長度調較SOP

坊間絕大部分繩都喺「可調節式」,方便使用者因應自己身高及需求去調節適合嘅長度,所以無論小朋友或大朋友都適用,如果過長嘅只需跟以下簡單3個步驟就可以調較完成。

  1. 解開繩尾打結位置
  2. 將柄內零件、柄及多餘拍子取出
  3. 重組柄及柄內零件,於柄尾打結後把多餘繩子(尾巴)剪走

調較小朋友繩長嘅時候,建議比「適合」長度再長約0.5-1個手掌位置,多出嘅部分可以喺繩嘅位置簡單打一個結(可參考圖右下),就可以將繩縮短去番適合長度。哩個方式可以預留空間比小朋友長高,日後當小朋友高咗嘅時候只要將結打開就可以繼續用,咁就唔怕條繩好快就唔岩用又要再買啦~

分享此文章

Share on facebook
Share on whatsapp
Share on telegram
Share on twitter
Share on linkedin
Share on pinterest
Share on email