花式跳繩 - 新手入門教學
無論想減肥或健身，跳繩一直都喺好多專家嘅推薦，可以運用到全身肌肉，增強心肺功能，短時間內達至燒脂增肌嘅功效。雖然知道好處多多，但對於未曾/較少接觸跳繩嘅新手嚟講，跳繩入門嘅門檻好似較跑步、Workout或其他運動高，唔知點樣揀合適嘅繩、擔心會傷膝蓋或腳踝、擔心唔識跳會不斷失誤等等。其實只要了解一啲跳繩嘅基礎姿勢及動作再多加練習，擺脫新手無難度！
跳繩入門第一式：握柄動作
最常用嘅個人繩都會由兩個部分組成 – 繩及柄。跳繩初學者一般建議用「拍子繩」，詳細原因可以參考另一篇文章「四種花式跳繩器材比較」。花式跳繩喺講求器材運用嘅運動，而繩柄喺控制繩擺動嘅重要部分，就如同乒乓球握拍、卓球握捍一樣，了解正確握柄方式就可以減低「甩柄」又或者「揈唔起繩」嘅情況～
正確握柄手勢應該喺伸出手指公，其餘4隻手指卷起，呈現出「Like」手勢，手指公伸出可以增加手接觸柄嘅面積，幫助穩定繩柄嘅擺動，同時亦可以更容易控制擺繩嘅方向，手指公指向天，繩柄就會連帶繩向上擺；手指公指向前，繩柄就會連帶繩跟隨向前。無論長柄或短柄，一樣可以用以上方式握柄。
跳繩入門第二式：預備動作
「預備動作」喺跳繩起繩前一個準備動作，如同100米短跑起步時候會有起跑動作，正確嘅動作可以幫助更輕易揈起繩同時減低起繩後立即失誤嘅機會。
正確跳繩預備動作：
1. 雙手握好繩柄並合緊，放喺肚臍位置，繩柄指前方
2. 雙手由肚臍位向外劃一個U形，並繼續放喺腰間位置
跳繩新手最常見嘅起繩問題喺雙手放喺肩膀位置準備，然後向前11字型擺繩，咁樣會令到繩嘅闊度收窄，落地嘅時候有過多繩接觸地面以致失誤。另外，手放肩膀亦會影響手嘅發力，令正常由前臂及手腕發力嘅動作變成由上臂及肩膀發力，而後者對於跳繩嚟講力量過大同時較難做一啲細致嘅動作，所以起繩後容易因用過大力令繩落地時反彈而導致失誤。
跳繩入門第三式：擺繩動作
大多數初接觸跳繩嘅人第一個問題都會問：「xxx身高應該用咩長度嘅繩先適合？」其實繩嘅長度除咗受身高嘅因素影響外，用途、跳繩經驗等等都係考慮因素，詳細原因可以參考另一篇文章「拍子繩如何調較合適長度？」。唔同嘅擺繩動作會影響繩嘅幅度，正確嘅擺繩動作可以令跳繩者更輕鬆完成每一下，甚至可以輕鬆跳出二重跳（又名：雙飛跳）、三重跳等等。
正確跳繩擺繩動作：
1. 轉動前臂及手腕
2. 繩柄一直保持指向外，並劃出細圓圈
新手最常見問題喺運用整個手臂擺繩，同「預備動作」原理一樣，上臂及肩膀會令跳繩者用過多不必要嘅力量，以致擺繩動作放大。
跳繩入門第四式：跳躍動作
對於想嘗試跳繩嘅人最大擔憂莫過於驚會引致膝蓋或腳踝等位置關節痛，其實適當嘅刺激喺有助保持骨骼健康，而對於發育時期嘅小朋友嚟講喺更加重要。
正確跳繩跳躍動作：
1. 一直保持前腳掌掂地
2. 起跳及落地時，膝蓋微曲並輕力跳起
做啱正確動作，就可以利用大腿及小腿肌肉發力跳起及落地時候嘅緩衝，減少關節之間嘅踫撞。當然要配合足夠嘅熱身同埋適合嘅運動鞋，按自己能力及身體情況調節訓練強度。
如果想了解更多動作嘅教學及注意事項，亦可以參考「跳繩教室」嘅影片教學，由花式跳繩教練講解每個動作嘅重點、練習方式及常見問題，內容由初階「預備及起繩動作」涵蓋至「二重跳」、「跨下一式」等等嘅進階動作，短短3分鐘就可以快速掌握，從此擺脫跳繩新手標籤～
